Şahyr sport hakda
21 Ноябрь 2013 г., 18:00

SPORT---ZYBANYMDA   DESSANYM!

        Garaşsyz döwletiň bagtyýarlyk döwründe Gahryman Arkadagymyzyň başlangyjy bilen ýurdumyzda sportdyr bedenterbiýe ulgamynda  bolýan uly özgerişlikler, rowaçlyklar her  bir  ynsanyň kalbyna  güneş  nury bolup  çaýylýar. Ykbal  çözüji wakalary ilki duýýanam, oňa  ilkinji bolup  öz  sesini  goşýanam   şahyrdyr. Sebäbi olar Watanyň, il-günüň ykbalyny öz ykbalyndan ileri saýýarlar.  Şeýle şahyrlaryň  biri  Türkmenistanyň   at gazanan medeniýet  işgäri, “Galkynyş” gazetiniň  bölüm müdiri   Hudaýguly Gurbanowdyr. Beýik özgerişlikleriň döwründe şahyr  döwür  bilen aýakdaş  gadam urýar. Ol öz  döwrüniň beýik işlerine    ýürekden guwanýar. Onuň ýürek buýsanjy  bolsa  kalbyndan  joşup  çykýan şahyrana setirlerine  özboluşly öwüşgin  çaýýar.

 Şeýle  bolansoň   bizem onuň  bilen  söhbetdeş  bolmagy  makul  bildik.Söhbetdeşlik gysga boldy. Sebäbi biziň berjek sowallarymyzyň jogaby  eýýäm şahyryň  goşgularyna  siňen eken.

         ---Şahyr, Size aga diýip ýüzlenäýsek aýyplaşmarsyňyz-da!

    ---Aga  bolup bilsek  armanymyz-a  ýokdur. Ýöne ajaýyp döwrümiz, Eziz  Arkadagymyzyň ähli  ugurlarda  bolşy  ýaly, bedenterbiýe  babatynda bitirýän ägirt  uly  işleri ýadawlygy, argynlygy, garrylygy ýada-da  salanok. Sag bolsun, Gahryman Arkadagymyz!

         ---Hudaýguly  aga, bizden öňürtip gürrüňi    sporta  syrykdyrdyňyz  oturyberdiňiz! Aňyşyma görä, Siz şähdaçyklygyň, ruhybelentligiň, ylham joşgunynyň  özenini sportda  görýän ýaly !?

      --  Bildiň. Bu şeýle. Neneň şeýle  bolmasyn. Sebäbi bize  bu  ugurda  hakyky görelde, nusga  alarlyk Beýik Ynsan  bar.  Bu günki gün ýelden ýyndam, ajaýyp  ahalteke bedewine atlanyp aýlawy baglamakda, gojaman Hazaryň mawy tolkunlaryny gulaçlap ak gämili ýüziş etmekde, nyşana ok atyp, mergenligini görkezmekde, sesden çalt uçýan uçary sürmekde, söweş tehnikasyna   başarjaň erk etmekde, «Alfa Romeo» ulagynda iň ezber sürüjiler bilen bäsleşmekde, welosiped ýörişinde kerwenbaşy bolmakda ähli ildeşlerimize görelde bolýan Eziz Arkadagymyz bar. Ýurt  Baştutanymyzyň her bir  başlangyjy körpelerden başlap, dürli ýaşdaky raýatlarymyzyň kalbyna galkynyş hem ruhubelentlik çaýýar . Onsoň neneň  şahyr  kalby joşmasyn !?

          --  Belki, başga-da ylham çeşmeleri bardyr?

          -- Barlygyna bar, ýöne  sportdan daşlaşmaýyn diýdim-dä. Her kimi bir  zat joşdurýar. Bagyr obam —dogduk depäm meniň ylham çeşmämdir. Obamyzyň gözelligi, adamlarynyň hoşgylawlylygy, myhmansöýerligi, öýümiň abatlygy, ýeňňeňiziň mähirliligi, çagalarymyň edepliligi, obamyzyň uz gözelleriniň sadalygy, ýigitleriniň zähmetsöýerligi, gojalarynyň pähim-paýhaslylygy, ilerimizdäki gojaman Köpetdagyň  gerişleriniň beýikligi, gaýramyzdaky Garagum çölüniň üstünden öwüsýän sähra  şemalynyň  ýakymlylygy, obamyzyň gündogaryndan dogýan Günüň tylla  nurlary, Bagyryň  Aýly agşamlary, töweregimizdäki durnagöz  çeşmeleriň joşguny... meniň setirlerimiň säbäpkärleridir.

          --Bu diýýän  zatlaryňyz-a söýgä çekip barýan ýaly. Ylalaşsaňyz söýgi meselesini soňa goýaly. Şahyr  kalby sport  barada nähili joşýarka?

         -- Dogrysy, men döwür  bilen aýakdaş gitmegi halaýan.Hoş habar eşitdigim dessine galama  ýapyşaýmam bar. Endige öwrülipdir-dä. Bu gün sport şol özgerişlikleriň öň hatarynda  barýar. Sport meniň zybanymda dessanym diýsemem ýalňyşmaryn. Şonuň üçinem  okyjylar meniň şol  joşgunymy şu  goşgy  setirlerimden aňar  diýip umyt  edýärin.

         --Beýle  bolsa, söhbetdeşligimizi gysgaldalyň. Size durmuş, maşgalaňyz, halypadyr  şägirt, kärdeşleriňiz  barada-da  sowallarymyz-a bardy. Ýöne olary ýeneki  söhbetdeşlige goýmaly  boldy. Gowusy, goşgularyňyzy  okaýsak!

Woleýbol oýnan mahalym

Ganat baglap uçýan Göge,

Woleýbol oýnan mahalym.

Begenýän men misli çaga,

Woleýbol oýnan mahalym.

Waspy owaz dillerime,

Şowhundyr sag-sollaryma,

Gujur gelýär gollaryma,

Woleýbol oýnan mahalym.

Şähdim açar, köňül joşar,

Bagtyýarlyk dolup-daşar,

Saglygyma saglyk goşar,

Woleýbol oýnan mahalym.

Boljak bolsaň ezber türgen,

Woleýboly oýna her gün,

Bar yhlasyň oňa bergin,

Woleýbol oýnan mahalyň.